Kurti pret në takim ambasadorin e ri bullgar, e falënderon për mbështetjen ndaj Kosovës

13:51 | 10 Prill 2025
K.B

Kryeministri në detyrë, Albin Kurti, mirëpriti në takim ambasadorin e ri të Bullgarisë në Kosovë, Hristo Kraevski.

Zyra e Kryeministrit njofton se Kurti e uroi ambasadorin Kraevski për detyrën e re, duke shprehur vullnetin e plotë për bashkëpunim dhe fuqizim të mëtejmë të marrëdhënieve mes dy vendeve tona.

Ai e falënderoi Bullgarinë për mbështetjen dhe përkrahjen e vazhdueshme ndaj vendit tonë drejt anëtarësimit në organizata ndërkombëtare si dhe bashkëpunimin e ngushtë rajonal e kontributin e saj në sigurinë rajonale si anëtare e NATO-s.

Republika e Kosovës dhe Bullgaria kanë marrëdhënie të mira dhe bashkëpunim të mirë institucional. Rritja e shkëmbimeve tregtare dhe forcimi i bashkëpunimit në fushën e ekonomisë, kulturës, inovacionit, sigurisë e mbrojtjes ishin ndër temat e diskutimit./Arbresh.info/